區議會選舉本周四開始接受報名，民主黨因為支持政改方案俾人民力量狙擊，加上建制派呢屆大打銀彈政策，不論送禮定動員宣傳都係大堆頭，令民主黨腹背受敵。黨主席何俊仁未報名先告急，直言今屆區選係佢從政以來「最凶險嘅一年」，為穩軍心，噚日仲一拖九帶咗黨內新星見傳媒。
仁哥本身都會競逐連任屯門區議會席位，對手有建制派強大嘅選舉機器作後盾，加上人民力量陳偉業亦空降佢嗰區，志在「票」，令一直支持仁哥嘅街坊鬼咁肉緊。呢排特首選舉炒得鬧哄哄，仁哥笑言唐英年同梁振英都有一個死穴，就係大是大非嘅議題上冇say，試問咁又點捍衞香港嘅核心價值？