當年今日

紅衫仔周紀:銀行收遮累及股仔

蘋果日報 2002/01/27 00:00


對於喺中環股票行返工嘅行家同埋韋衡嚟講,上個禮拜三確係一個悲喜交集嘅日子,可喜嘅係港府班高官終於首肯將「取消最低佣金制」推遲到明年4月實施,令到面臨失業嘅行家暫時有番啲安樂日子過吓,但可悲嘅就係傳出英傑證券老闆失蹤嘅壞消息,搞到班散戶個個杯弓蛇影。
今次政府咁順攤肯無條件延遲實施呢條「惡法」,聽講都係嗰朝早班高官突然聽到英傑證券出事,為咗要安撫人心,以及唔想班經紀上街遊行搞事,即刻喺嗰日下晝約見證券界4大組織嘅掌門人,公布新安排,所以今次能成功將條「惡法」延遲實施,都可以話係英傑單嘢催化而成。

英傑出事牽連甚廣
喺英傑出咗事之後,銀行見勢色唔對,即刻使出其「看家本領」,一招「落雨收遮」令到班大戶無銀両買貨下,有經紀行即刻開始進行斬倉。
星期四嗰日就有好多隻股仔出現急跌嘅現象,其中一隻惠陽控股(231)就更加急跌咗七成幾,最後班管理層要求將隻股份停埋牌。
惠陽控股股價今次急跌,班行家話今次完全係因為有人睇啱咗呢隻殼,原本打算坐低慢慢傾,不過聽講有人將啲股份按咗畀銀行,而另有人預計銀行對證券行收遮,見今次機不可失,就喺市場上狂掟隻股,希望可以造低個價迫銀行斬倉,然後一手喺個市場攞晒批貨。
雖然班買家估唔到未吸夠貨就停咗牌,但由於隻股個價已經跌咗超過七成,如果隻股復牌,班賓卡為保住自己仍然會繼續掟貨,最後結果都係一樣。不過究竟班新買家有乜打算,相信至係班原有股東最關心事。