十幾年前，孫柏文仲喺股票行做緊石油股分析員，記得第一次喺香港見到中石油（857）、中石化（386）嘅油站時反應：「嘩！確實高明嘅IR（投資者關係）動作。」

無它嘅，香港人好醒，知道每間公司到最後都係要令啲客滿意先有得賺。所以如令香港人滿意，我哋全球無敵嘅社交網絡，就會自動啟動，幫你sell佢有幾好。如果唔係，中石油當年都唔會成為全球第一間市值超萬億美元企業（係呀，Amazon行開啲啦）。

早個禮拜，見FB有傳政府賣招聘廣告，想用月薪廿六萬，請個「一帶一路專員」。朋友利世民就一句：「你話好筍又唔係。」

廿六萬，當然多。齋逗，當然開心，相信利世民都會咁講。不過，佢話「好筍又唔係」，唔係因佢劉鳴煒上身，而係呢份工如果想做得好，其中一環，甚至最重要一環，就係向外國sell「一帶一路」。就係咁，就算有咁嘅薪水，香港PR界奇才利世民都咁評呢工。

「一帶一路」，點sell呢？撇開西方傳媒，已標籤佢為「新殖民主義」，呢個「外憂」外，你做專員去外國，開口sell時，對方都一定話：「唔係喎，我同個香港人朋友傾過，佢都話係搵笨！你唔好收咗錢就亂講先得㗎。」

點解我哋老百姓會咁講？就係大陸牽頭嘅香港基建，不斷傳臭味。冇停過。由天價，到顧問估需求，由工程，到依家每個飯盒一嚿水，有邊單可以令我哋何志平上身呢？

大陸喺香港揀嘅領導人，聽話就真係聽話，話起乜就起乜，要點起就點起。不過代價就係香港人強勁嘅全球社交網絡，就會成為不斷嘅「打毒針」渠道。冇計啦，啲人自己揀，出事唔好喊。

孫柏文

全球樓行 Dream House零距離
https://hk.feature.appledaily.com/overseasproperty