發展商賣樓花,會提供建築期付款法畀買家,入伙前一般分階段畀樓價三成,𠵱家二手盤業主都效法,首期重低至五個巴仙。
世紀21張潤森話,馬灣珀麗灣二座中層G,業主剛收樓,單位未住過,就以二百五十四萬賣畀外區換樓客。單交易最特別係,首期半成,即十二萬七,餘款九月底完成交易時付清。
聽講,買家都係用長交吉期,賣出自住嘅荃灣單位,收到錢就用嚟找數,所以堅持只畀五巴仙首期。
由於業主係新晉投資者,加上見珀麗灣有成千個放盤,銀行又加息,見有賺、速速賣。個價比市價高幾萬,佢舊年用二百二十萬買番嚟。
GiGi帶你遊德福
地鐵九龍灣德福廣場,請嚟人氣女藝人梁詠琪GiGi任代言人,重用佢嘅肖像,包裝一列觀塘線列車做宣傳。
班車前日開始投入服務,為期一個月。車廂內共有四款GiGi造形,目的當然係宣傳德福廣場嘅店舖啦!
𠵱家地鐵一日乘客逾二百四十萬人次,搭觀塘線嘅,都有番咁上下,話唔定啲GiGi迷,重會專程搭呢條線㖭。
蘭西覺得,地鐵最好連成個九龍灣站,都用埋梁詠琪嘅肖像包裝,咁啲乘客肯定對德福廣場印象更深刻。