古惑賊仔買110蚊平嘢做掩飾，趁機偷走700蚊貨品！黃先生喺尖沙嘴加拿分道開舖賣手機配件，噚日聖誕節夜晚收舖後點貨，發現少咗兩支錄音筆，於是翻睇店內嘅cctv，結果發現有個男人喺當日下晝兩點幾嚟買嘢，其間偷走兩支售價合共700蚊嘅錄音筆，店主今日去咗差館報警。

根據cctv片段睇到，當時一個孭住橙紅色背囊嘅男人，企喺舖頭門口遞手叫店員出去，佢想買兩個分別10L同15L嘅防水袋，叫店員幫佢攞。佢趁店員喺門口幫佢攞貨嗰陣，行入店入面，好快手咁擸咗一盒錄音筆，收埋喺件衫入面，收好之後仲若無其事撥一下頭髮。跟住店員攞咗兩個防水袋畀佢，總共110蚊，佢照畀錢。

黃先生話cctv見到個背囊男畀完錢之後冇即刻走，拎住兩個防水袋喺舖入面繼續睇嘢，然後佢再拎起一盒同佢較早前偷嘅一模一樣錄音筆，望兩眼就乍乍帝夾喺兩個防水袋之間，神不知鬼不覺就偷咗兩支錄音筆走咗去。

黃先生同小記呻，舖頭幾乎日日都有人偷嘢，佢話舖租貴，賊仔偷幾十蚊嘢都算，偷幾百蚊嘢真係唔可以算，所以佢今日下晝去咗尖沙嘴差館報案，希望警方憑cctv片段可以拉到個賊。為咗警戒啲人唔好再去偷嘢，佢仲話如果有人認到cctv片段入面嗰個背囊男，而且成功令警察拉到個賊嘅話，佢唔介意畀薄酬2千蚊。

警方回覆亦都證實接到黃先生嘅報案，懷疑有個男人偷咗兩支錄音筆，警察經初步調查之後將案列作盜竊處理，交由油尖警區刑事調查隊跟進，暫時未有人被捕。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568