現年41歲嘅「香蕉仔」鄧一君，自05年退出娛樂圈轉投保險業後已有10多年冇參與幕前演出，直至近日喺王賢誌邀請下，一君再度出山，為下月2日至4日於灣仔藝術中心壽臣劇院上演嘅舞台劇《金星撞火星》演出，飾演王賢誌同志伴侶，兩人今次更係處男下海首次演出舞台劇，劇中同朱慧敏展開一段三角關係。另外，當年一君喺《香蕉成熟時》合作過嘅童愛玲，以及喺《陰陽路》合作過李惠敏都有份演出。

一君、王賢誌及朱慧敏，日前於觀塘為《金》劇進行綵排。一君透露，上次拍攝演藝工作，是04年拍攝無綫電視劇《情迷黑森林》，一君說：「我個角色非常重要，雖然戲份唔多，係好有發揮，係好關鍵，各位想知道咩事就要入場睇，十幾年冇做演藝工作，上一個拍攝工作，係04年拍無線《情迷黑森林》，舞台劇係第一次。」一君一口應承王賢邀請演出，佢話：「我諗住當玩吓，咁耐冇做戲，當興趣玩吓，做戲都好玩，舞台劇可以現場即時睇到觀眾反應，係另一個新挑戰。」一君沒有太多考慮而接洽今次演出，一君笑言：「唔需要了解角色先，我哋不嬲都唔揀角色，做棵樹咪做棵樹囉。客串角色，一晚出現一次，一場戲。」能再與首部電影作品《香蕉成熟時》的拍檔童愛玲合作，又與《陰陽路》的李惠敏合作，如再有機會拍攝電影或電視劇會否重投演藝事業，一君持開放態度，佢話：「睇吓時間同角色，有得傾既。」又笑言王賢誌是其經理人，有需要可找Vinci。

Vinci於劇中糾纏於朱慧敏與鄧一君之間三角關係，Vinci說：「劇裏面講Queenie睇中咗我，點知係一個錯愛，我有另一半一君，我哋係一個三角關係，個關係是如何就要等觀眾入場看看。」今次全靠Vinci拉攏一君出山演出，Vinci說：「今次大家走埋一齊，一君係我保險經紀，但係唔熟，呢幾年見佢都係傾保險，佢知我要做一個舞台劇，導演話要需要搵多一個人客串，做一個好特別角色，我膽粗粗問佢肯唔肯客串，佢二話不說三場都幫我哋客串，知道有Queenie之後更加啱，大家都熟，今次更與童愛玲同台出，雖然沒有同場，但都可以一齊做一個劇。一君一口便應承，沒有深究要做甚麼角色，專業沒底線。」對於王賢誌與鄧一君於戲中有否親熱戲，Vinci話：「未排到咁重要場口，睇導演點發揮，親熱有好多種，要研究吓，朱慧敏喺戲裏面會投懷送抱，好主動，我幾被動。究竟我同一君係咩關係，Queenie都好想知，但暫唔劇透，故事係講幾個女人嘅愛情故事，去到呢個年紀搵自己啱嘅男人。」

朱慧敏於劇中飾演事業型女性，對擇偶有要求，一直未遇到心儀對象，直至遇到年青才俊王賢誌（Vinci）。Queenie話：「我好開心見到一君，我哋起碼8年冇見，我哋以前一齊做財經節目《創富坊》，第一代主持，一君當時每星期返2、3天，大家是拍擋，我好深深多謝一君，當時好忙，要拍劇到好夜，早上又要做《創富坊》，朝早9點直播，7點幾要到，我拍古裝《盛世人傑》，古裝拍到朝早6點，跟住就轉裝，有一次同一君講，叫佢睇住我，我真係唔得，我想嘔就嚟暈，我同大家講如果見我有咩異樣，唔該即係俾個大頭一君，一君好鬆容，處之泰然。」