埃及翼鋒穆罕默德沙拿周四正式加盟利物浦，但波衫「冧巴」就唔係早前傳出嘅9號，而係着番佢嘅羅馬球衣號碼11號，原有紅軍11號主人羅拔圖法明奴就改着9號…利迷心諗，呢個「正前鋒加9號」嘅魔咒，唔係又要輪迴多一次啩！

112場入17球，呢個就係過去4位紅軍「9號仔」嘅英超入球數據。首先喺啱啱俾沙拿打破球隊轉會費紀錄嘅安祖卡路爾，兩季半踢咗44場入得6球咁大把，之後到伊亞高艾斯巴斯上陣14場竟然食白果！老將列基林拔都唔好得幾多，踢25場入得兩球，賓迪基叫做稍為好少少，但29場都係入得9球，最終加盟水晶宮。難得法明奴轉「冧巴」都好錫住fans，任何買咗法明奴新季11號印字波衫嘅球迷，可以將件衫寄番球會，法明奴就會親筆簽名，希望佢好心有好報！