東亞銀行（023）主席李國寶自從舊年唐唐競選落敗，加上佢老哥又退選立法會後，好少月旦時事，公開露面亦買少見少。之但係，CY政府最近連環出招欲震懾樓市，樓市走勢同銀行樓按生意息息相關，大家當然想聽吓寶哥哥有乜高見。

不在其位　講多無謂

寶哥哥一向推崇自由市場兼新聞自由，早年曾支持取消聯滙，葉劉當年做保安局局長硬推23條時，佢亦公開斥責，可見佢係敢言之人。雖然近年佢盡量交畀兩位公子發揮，但冇理由話變就變晒，但佢噚日確實唔肯暢所欲言，要記者多番追問先吐露兩句。
對於政府出招，寶哥哥最初將個波射畀長子李民橋，記者唔收貨，佢先笑笑口拋低金句："All regulations are over-regulation!（所有規管都係過度監管）"。再三追問，佢就變身太極張三豐，話「我完全冇意見……已離開咗politics（政界）」。
咁以銀行家身份又點睇呢？佢就答：「我係一個free market tier（自由市場支持者）……我好鍾意free market，唔鍾意有regulations，無奈呢個世界係咁（越嚟越遠離自由市場）！」

四叔辭職　有餐晏食

走遠嘅仲有恒地（012）主席李兆基，四叔自1987年加入東亞，4月辭任獨董，寶哥哥噚日同四叔食晏，多謝佢26年貢獻。四叔之後只做恒基系董事，同新地（016）非執董。

李華華
mailto:[email protected]