《蘋果日報》慈善基金今日喺清水灣鄉村俱樂部舉行「慈善高爾夫球賽2018」，型男任達華同壹傳媒集團非執行董事葉一堅主持開球禮，鄧梓峰、林敏驄、宋豪輝、黃迪基、林韋辰、梁珮瑚同蒙古商人老公郭雲飛、楊如芯（Sean）、陳綺明等分組出賽。

經過一個下午比賽，最遠擊球獎係宋幸文 ，最近球洞獎由Sean取得，至於冠亞季軍，依次係Steven Cheng 、梁佩瑚、鄧梓峰，今次慈善高爾夫球賽邀請咗王馨平（Linda）做頒獎嘉賓。

本身都係高球愛好者嘅Linda，佢喺上屆有出賽，不過因為今午要教瑜伽而未暇參賽，Linda話：「我平日周一，周二同周五都會教瑜伽，今日咁啱有堂。」Linda下周就閉關要再進修瑜伽，佢話做瑜伽有助伸展，咁樣有助復原肌肉勞損，所以兩種運動都係Linda鍾意。

梓峰好開心得季軍，佢話：「永遠攞獎都開心，滿意成績，享受個場，天氣同波腳。」亞軍梁佩瑚：「好意外，第一次參賽就拎獎，好開心。」打了三年高球Sean今年奪得最近球洞獎，佢話：「冇諗過拎獎呀，好滿意成績，下屆都一定支持。」

精選娛聞，喺晒《娛果》
http://fb.com/appledailyent