伊斯蘭國（IS）大軍殺入香港，仲以全港最大政黨嘅前主席譚耀宗做目標？大家唔使為譚Sir人身安危擔心住，事關呢批IS成員暫時只係搞譚Sir個立法會網站。話說譚Sir個網噚日晏晝起被自稱極端組織IS入侵，喺「立法會事務」頁面顯示「We Are ISIS」（我們是伊斯蘭國）；點擊進入後會顯示一幅恐怖分子持槍相，亦會彈出視窗，顯示呢個網頁已被IS攻陷，仲會響起一首阿拉伯話歌。
八方噚日黃昏打畀譚Sir時，佢都仲未知網站俾人搞喎。佢話自己個網站不嬲都唔活躍，「查實都冇乜人睇」，而呢次咁樣被搞，「反而幫我宣傳個網站」。有網民就話民記竟然獲得IS注意，值得拉banner成功爭取一番。