當年今日
關於我們

浸大學生會會長遭停學 參選宣言:一腔熱血同強權戰鬥

蘋果日報 2018/01/24 17:14

浸大停學

遭暫時停學的劉子頎為社會科學院學生,去年3月競選浸大學生會幹事長,參選宣言指浸大風氣樸素,希望「團結同學一齊守護院校自主及學術自由」及「為鞏固香港民族意識而努力」,又自言「單純擁有一腔熱血,倔強咁選擇同強權戰鬥」,並願意「為守護呢一切,付出所有。」以下為其宣言全文。
「近年嚟,本土意識冒起,但喺港共政府同中共眼中,保衛香港嘅想法都被視為原罪,教師對港獨絕口不提,學生唔可以喺校園外派發宣揚香港獨立嘅傳單,而港共政府為咗禁絕香港民族意識,甚至借人大之手強奪民選議員嘅席位,視背後近六萬選民為草芥。唔知係香港人習慣咗荒謬,定已經對未來絕望,自雨傘革命,中共對香港嘅打壓愈加嚴重,多番打壓爭取自由之聲。但香港人視若無睹,只期望某日記憶中嘅香港就會重現。但我唔相信中共喺往後日子會信守承諾,我唔相信中共會停止干預香港。我唔相信港共政府會帶領港人奪回應有嘅權利同尊嚴。
我當初入讀香港浸會大學,就感受到呢個地方獨有嘅樸素風氣,無論係人或者事,一諗起都會令我會心微笑,我唔希望呢個地方受到任何傷害。但港共政府視學界為眼中針,雖然表面尊重學術自由,但千方百計希望控制大專院校,借教育為名,洗腦為實,培養一個又一個屈服喺港共政權淫威下嘅奴隸,我唔甘心。
所以我決定參選香港浸會大學學生會幹事會,在內,代表同學向校方發聲,團結同學一齊守護院校自主及學術自由,並且為同學爭取應有嘅權利。在外,團結學界力量,一齊為鞏固香港民族意識而努力,永遠企係抗爭者一方,對抗強權。
我希望喺一年後,浸大仍然簡單樸素,唔比任何強權所壓迫。我希望可以將社會議題帶入浸大校園,令浸大學生成為關心時政同勇於發聲嘅團體。
我唔識政客嘅手段,唔識去交換利益,亦唔識去屈服。我只喺單純擁有一腔熱血,倔強咁選擇同強權戰鬥。我願意為守護呢一切,付出所有。
城危作壑鈺,世亂而匡時,願浸大同學可以同我哋十五個人一齊,為浸大,為香港,打一場逆轉勝。」
(全文完)