梁漢文（Edmond）嚟緊8月將會去到九展開騷，講到Edmond被指為「仲爭少少先去到巨星級數嘅歌手」，好多人戥佢唔抵，Edmond反而好豁達：「可能喺好多人眼中，我唔係Superstar，但我知道喺粉絲心目中，我係No.1。我係默默耕耘嗰種，好清楚自己行緊嗰條路，會更加入到大家個心。」多年來，Edmond感恩遇到唔少機會，雖然有時把握得唔夠好，但期望之後會把握得更好！

從來都是唱得之人，Edmond嘅歌聲自然有好聽保証，而人緣亦係圈中公認的好。Edmond最近推出新歌《終身贊助》，於圈中打滾多年嘅Edmond表示：「友誼係要時間去昇華，同幕前幕後嘅合作，已經唔止係做嘢，彼此之間建立咗感情。」提到多年來令佢最深刻嘅感情，Edmond坦言：「記得有年拍緊《西遊記》，當時未簽Paco（黃柏高），只係簽咗畀曾志偉，份約好短，1、2年左右，但係過咗半年，Paco就出現。我開門見山同志偉講，志偉話『你去啦，其他嘢我會搞掂。』我好感恩。」

除了受到好友嘅幫助，Edmond亦不知不覺幫助過別人：「有次幫一個人拍演唱會特輯，嗰個人話我喺佢初出道嗰陣，有單緋聞嘢我幫過佢口，其實我已經唔記得咗，嗰個人就係側田，原來佢當時覺得我好似大佬咁幫佢出頭。」