《信報》噚日發出內部通告，宣佈委任電訊盈科新聞及財經資訊首席副總裁羅燦，下月5號起出任《信報》董事及行政總裁，同時宣佈何國輝因個人事務辭去《信報》CEO一職。羅燦一直掌管now財經台同新聞台，今次空降《信報》，自然引起報社中人唔少揣測。

否認干預編採獨立

有《信報》中人講，昔日小小超搵何國輝入《信報》，主要搞掂副刊同廣告，家功成身退，輪到搵做過《蘋果》嘅羅燦入去，今次應該輪到「改革」新聞編採部。個通告仲同時宣佈，《信報》老總陳景祥將兼任公司董事，主攻策略發展，自然惹人猜測。
八方噚晚打電話問羅燦入《信報》有乜大計，佢承認「改革係難免」，因為家報紙要同時發展網上同手機版，內容必須提升，《信報》嘅傳統強項固然要保留，一啲人手唔夠或者仲可以改善嘅，例如A股市場、國內政策、香港作為金融中心面對嘅挑戰等等方面嘅新聞，可以再加強，仲有，財經係專業分析，但係要吸引到一般普羅大眾layman（門外漢）都啱睇，亦要花啲心思。
至於干預編採獨立之說，羅燦強調主要會同編採部高層傾大方向，何來干預。