成日話三個女人一個墟，其實呢個世界唔止女人鍾意圍埋雞啄唔斷，如果開啱話題嘅話，幾個男人圍埋都可以吱吱喳喳。噚日又係香港老爺車會一年一度喺中環遮打道舉辦老爺車展嘅日子，香港會計師公會前會長周光暉與漢傳媒（491）前主席余錦基對住一街老爺車，架架如數家珍，跟宅男興高采熱討論動漫冇乜分別！
噚日約有100部靚車參加呢個古董車展，吸引一大班中年以上嘅男性發燒友到場參觀。周光暉本身擁有兩架老爺車，連續5年參與呢個活動，舊年佢憑一架1963年勞斯萊斯Silver Cloud III攞埋獎，今年話要讓吓其他人，唔參賽，齋參展。

揸69年Fiat 500去買餸

身兼汽車會永遠榮譽會長嘅余錦基，就拎部湖水綠色嘅1969年Fiat 500出嚟公諸同好。佢侃侃而談，話除咗性能、外型，汽車仲可以代表歷史與傳統，了解埋背後嘅故事，先算真正識得品味古董車。
佢以自己部Fiat 500為例，就因為意大利戰後蕭條，要慳油、慳鐵皮，先至有咁的骰嘅款。余錦基笑住話，每次揸呢架出街「買餸」，街上嘅小朋友都會指住嗌「好得意啊」，佢4歲孫仔亦超鍾意呢架好似玩具嘅古董車，一提到孫仔，佢就一邊講一邊笑到蓮子蓉咁喇。
周光暉、余錦基同其他發燒友噚日喺現場逐架車欣賞，幾個人圍埋一齊就雞啄唔斷，講整車、買車心得，型號、年份、優劣，全部如數家珍，佢哋嗰刻真係同宅男討論動漫冇乜分別。
佢哋又教路，識得揀限量生產、得過獎、或者標誌性車款，將來就有機會因老爺車升值而賺一筆。
不過，老爺車係花錢、花時間嘅有錢人玩意，大家要有車房擺車，再閒閒哋拎過百萬買車、整車先。

李華華
mailto:[email protected]