香港傳銷騙案不時發生，但「傳銷王國」依然越開越有，最新一單是「慈母計」銷售豬肉計劃，涉及非法集資騙案。

早前《蘋果》收到多名讀者投訴，指近日有間名為「優農良品」的公司在尖沙嘴酒樓內舉行「洗腦大會」，「話傳銷豬肉，現場有好多師奶、公公婆婆都信晒，仲話要搞旅行團睇豬場，有對母子喺現場落力sell，講到搵好多錢。」會上更稱「投資10萬，2年拿21萬」、「實現年產值100億元，完成香港主板上市」。

記者依讀者所示，向「母子檔」計劃成員查詢，但皆要以相片核實身份，警覺性相當高。幾經交涉下，記者終於突破他們戒心，獲邀到辦公室參觀。

記者甫到位於尖沙嘴辦公室，即被中年女士Jacqueline不斷追問年齡及職業，記者佯稱是文員。後來慈母帶記者到茶樓，席上一名有內地口音的女子Barbar及年輕男Alex等候。據了解，Barbar為「優農良品」的高層，成功邀請年輕男Alex及「慈母」Jacqueline加入，之後決定「母子檔」形式不斷找客人加盟。

記者一坐下，Alex以「車輪式」向記者「洗腦」，指打工浪費時間，「但係依度就唔使，用時間、同身邊好朋友講就有錢收。」記者問及為何公司沒有網上宣傳，「慈母」隨即答：「咁做咪同出面無分別，如果個個都話嚟買，咁點算？」

稱創辦人是軍官

「力sell」一小時之後，記者終被帶到辦公室。她向記者透露，「優農良品」開設是因為跟隨國家主席習近平的國策，並指「知道省市啲官員食咗國家啲錢，所以習近平就話唔會再畀項目地方，於是畀軍官，話晒都係自己人。」

她指，「優農良品」創辦人程榮河正正是軍官，「佢做咗三十幾年兵！帶兵打仗，下低有兩萬幾個人在藉。」更表示「97年香港回歸，佢都係喺灣仔，負責香港解放軍！」而公司就是在廣州投資豬場，更表示可到現場參觀，並試食豬場生產的「旺旺豬」。

記者表示擔心非洲豬瘟疫情，她立即指：「唔會！完全無嘅！依個養殖場用中國科學院嘅飼料，連水都係專利」，更指豬隻由駐港部隊運到香港，「因為佢唔食香港嘅嘢，我哋啲貨都係咁運過嚟。」

Barbar越說越激動，更指「中央喺肇慶畀咗一個60平方公里嘅地，大過香港島。我哋喺民間收購咗豬仔，就用農科園技術，畀啲豬食咗27種中草藥，所以又瘦又長，弱鹼性嘅豬，你食落去係脆嘅，唔係油嘅。」她更指：「我們係零成本養殖，國家畀土地、資源水農區，有鵝、有雞仲有水魚，全部都係國家嘅。」

啲豬食落去係脆嘅，唔油嘅

口音女Barbar話音未落，年輕男Alex即「接力」宣傳，向記者解釋傳銷計劃，「我用10萬嚟計，投資完就有同等價值嘅產品、豬肉呀、雞呀，有排食，唔會限你幾時拎。每個星期都會派錢，派1,731蚊，乘番104期，總共就有18萬。」

他續指，「想搵多啲，可以推薦人，5%之外再加6%回佣，即係10萬嘅11%。推薦兩個人投資10萬就可以升職，再推薦第3個，回佣就可以變成16%。」

Alex與Jacqueline更透露已投資200萬，並展示他們的收入：「我3月嗰時入嚟，依家6月頭，介紹咗3個人入嚟，佢哋又介紹人，就已經搵到30幾萬。」記者表示不懂銷售，Barbar即教記者：「當你身邊朋友睇到你有轉變，睇到依排咁懶，佢就會搵你，求其講一講都搵到。」更指Alex「講嘢都唔叻，都一樣做到。」

記者對投資金錢的用途表示質疑，Alex解釋：「咪就係建豬場！依個係公司融資手法，擴大生產線。」Alex更指：「之後就無晒頭啖湯㗎喇！」更指公司一定會買殼上市。」記者「被洗腦」逾一小時始能離開。

《蘋果》為試探「優農良品」傳銷局底蘊，應邀出席「旺旺豬」試食大會，記者發現「旺旺豬片」肥肉偏多，完全不像與介紹所指「又瘦又長」，在場有準會員吃了瘦肉部份就放棄，Barbar見狀即解畫：「就算係肥肉都唔係肥嘅，就咁用滾水煮已經好濃郁！」記者吃了一小口，味道與市面豬肉沒有太大分別。講座途中，一名年輕西裝男已離場，但其餘兩對中年男女則聽得津津有味。

記者試食中藥飼養「旺旺豬」

之後「慈母」Jacqueline「力sell」，得悉自稱文員的記者薪金不多，只可投資1萬，於是向記者母親「埋手」，力求說服記者母親借出10萬元加入最高級計劃。

「慈母」解釋：「你約佢出嚟，等我慢慢同佢講，同佢明白你個仔依家做咩投資，唔係呃人。」對於是否成為她的「下線」，她拒絕承認為層壓式傳銷、「上下線」的關係，但指「你係我介紹，你入到嚟梗係跟我。」

「慈母」為了要記者投資，不斷軟硬兼施，稱「幾萬蚊對你媽媽嚟講好少，全部都是落地，實際嘅公司。」記者坦言計劃「有啲假」，她立即很大反應地指：「嘩！畀你睇埋豬場，仲唔夠好？習近平、中央政府嘅嘢，我都係睇中佢軍方背景先同佢合作，中國夢邊有得假！」

記者翻查「優農良品」註冊資料，發現公司於今年3月註冊，創辦人名單中並沒有「軍官」程榮河，反而出現了關錦榮及程瀚鋒的名字，程瀚鋒名下兩間公司均已解散。而關錦榮為多間公司董事，包括澳文利嘉貿易、億林科技及志聯國際商務，亦包括2間已解散公司。

記者亦翻查這間公司內地工商紀錄，發現程榮河的確在開設了「廣東優農良品農牧科技」公司，於2016年註冊。而公司主要股東之一，金農良品（董事長同為程榮河，持股比例60%）於2018年7月更顯示公司未能按照規定發佈年報，顯示為「經營異常」，內部情況成謎。

創辦人只是新香港人

關錦榮的公司報住秀茂坪下邨秀好樓及旺角新填地街新利大廈，程瀚鋒報住地址則為一金融公司，所有單位皆不是二人持有。記者曾到關錦榮兩個地址訪問，單位都沒有人認門。

《蘋果》亦發現關錦榮以私人名義於2015年以538萬元購入尖沙嘴諾士佛臺樂福大廈一單位，經滙豐銀行按揭後，先後4次將物業加按，合共最少借貸330萬元，最近一次為去年10月向「財仔」貸款200萬元，其財政能力成疑。

記者到「優農良品」兩位創辦人關錦榮及程瀚鋒報住地址探訪不果，決定依「慈母」所示，參加於尖沙嘴The One酒樓舉行的大型「洗腦大會」，全場已被「優農良品」包起，筵開60席，場內更有專櫃烹調「旺旺豬」。

「洗腦大會」以每席10人計最少邀請了數百人參加。酒樓帶位員表示，「優農良品」已舉辦多次大會，每次幾乎全場爆滿。不少操普通話的中年「大媽」準備乘電梯上酒樓，並隱約聽到邊笑邊說「這個很賺錢」。

「慈母」發現記者身份後破口大罵

《蘋果》向「優農良品」員工查詢老闆之一關錦榮是否在場，欲求證事件。員工得悉記者身份後支吾而對，立即帶記者到大堂角落處，以防其他人看到。記者從遠處發現白色肥身材大漢坐上VIP席，與早前「慈母」所示關錦榮樣子脗合，但得悉記者出現後立即離開座位。

「慈母」得知記者真正身份指罵記者：「你知唔知咁樣嘥人時間、嘥我時間」、「依家免費上報紙呀？」最後員工更帶同3名聲稱是保安的魁梧大漢「圍堵」記者，其中一名大漢以不純正廣東話指：「我哋有邀請先至嚟到。」並指關錦榮已經離開，不會接受採訪。

本報記者
-----------------------------
7月4日起 《蘋果動新聞》只限升級壹會員閱覽
繼續撐蘋果！