MeredithWhitney，07年10月30日成為第一個大行分析員，出報告唱淡花旗銀行。當時，佢話花旗銀行將要減（淨係減咋！）派息或變賣資產去彌補達300億美元嘅虧損。一出報告被視為淡友。當然，如果今時今日，花旗宣佈成個金融海嘯只輸300億，股價即升10倍，哈哈。
點知上禮拜一走出嚟話可以策略性吸納銀行股，股市因佢「轉軚」大升。
Roubini，講嘢勁似芝麻街嘅吸血伯爵。06年尾走出嚟話花旗國銀行體系將會輸一萬億美元（onetrillion），當時被主流批為嘩眾取寵，亦被確定為淡友。到今日，如果銀行體系真係只需一萬億就唔再資不抵債，唔好話花旗國政府，我國中央政府都會話：「咁平！我嚟救！」
點知上禮拜四被人話佢覺得「最壞時刻已過」，搞到啲人話佢「轉軚」，股市即大升。

上周股市升到驚

唔要來路貨，陀地嘅都有。例如有幾年前已大吹淡風，有港版「末日博士」之稱嘅交通銀行經濟師羅家聰，年初話恒指睇8000至10000。點知早前話個市今浪可升到冇人信嘅21000點。
講到淡友當然提吓自己。07年7月30日叫人140蚊一注獨沽滙豐，點知即升，三日後上電視鏡頭前俾青姐（胡孟青）用籐條打屁股。雖然今年五月叫人嚴守sellinMay，又叫人一注獨沽港交所，點知個市上禮拜嘅升勢連孫柏文都驚，勁想掉頭叫人買升。
淡友已全部投降，你話見底定見頂？
孫柏文
http://phatdat.blogspot.com