「意大利足球奧斯卡」周一揭曉，簡拿華路再下3城，包攬最佳球員、最佳後衞同最佳本土球員獎；不過，今屆典禮場面尷尬，唔搞好過搞！
首先，12個獎項入面，除簡拿華路外，意乙祖記門將保方囊括最佳門將同最受歡迎獎，即係接近一半得主唔係打緊意甲，你話幾諷刺呢？其餘獎項，最佳外援由卡卡、蘇亞素獲得，最佳教練係羅馬嘅史巴利堤，最佳年青球員係羅馬中場廸羅斯，最佳射手「費倫」嘅東尼，最佳球證路錫廸，最佳入球屬於托廸。

羅馬先至係大贏家

咦！原來羅馬先係攞最多獎嘅意甲隊，反而榜首嘅國米連一個球員入圍都冇，如果唔係伊巴謙莫域到場無故笑到見牙唔見眼，好多人會以為國米唔屬於意甲，你話諷唔諷刺呢？好彩，好多昔日意大利球壇明星都到場支持，好似已掛哨嘅光頭佬球證哥連拿同太太亦有到場，佢睇落好似後生咗10年。
最後，我求大俠想糾正下華文傳媒，佢哋將“OscardelCalcio”翻譯為意甲奧斯卡，其實Calcio係足球嘅意思，只不過往年意甲風光，所有獎都由意甲球員包辦，所以內地傳媒起名「意甲奧斯卡」，應該叫意大利足球奧斯卡準啲。

「意大利球壇假大空慣，一年一度頒獎典禮點都要搞得好好睇睇，不過投票結果冇得呃，搞到最後都要醜態畢露！」