鍾楚紅今日現身新加坡機場，據讀者報料，紅姑今日坐國泰班機去新加坡，約下午4點左右落機，見佢一個人一身casual wear，着住對涼鞋，真係好隨意，不過讀者讚佢依然係好靚，好有星味。

紅姑一個人攞住4箱行李，佢喺機場同女性友人打完招呼，就一個人推住行李車出機場，直往停車場方向走，之後有專車將佢接走。

頭先《蘋果》打俾紅姑，問佢去新加坡做乜？佢話：「辦一啲事，之後就順道探個妹。」問佢係咪留喺嗰邊過聖誕？佢否認：「唔係，我留一個禮拜就返香港。」紅姑妹妹同老公結婚後就帶埋仔女移居新加坡好多年，兩姊妹感情好好，所以一有時間她會飛去新加坡探吓個妹。