當年今日
關於我們

【短片】【獨家有片】殘酷一叮莫生自嘲似張如城揭遭集體欺凌辛酸史

蘋果日報 2016/07/30 06:00

蘋果欺凌童星即時娛樂張如城紅日之火殘酷一叮莫生莫凱謙

童星出身嘅馮寶寶曾經講過,童星條路好難行,不過對於6歲因為《殘酷一叮》而入行嘅莫凱謙(莫生),佢反而覺得呢個係一個好好嘅經歷:「對我嚟講,做童星係一個好好經驗,俾我早啲接觸大人嘅世界,睇到啲其他小朋友睇唔到嘅嘢,多咗一樣嘢令我成長,好感恩有呢個機會睇多啲世界。」

但係正因為呢個不平凡嘅經驗,莫生坦言童年時試過遭奚落,他稱:「當然學校一定會有,不過小一嗰個班主任好好,佢同其他同學講,話我只係參加比賽,咁啱俾人揀咗上電視,仲喺班上搞咗個比賽,鼓勵吓大家。但係去到3年班,可能佢哋會覺得我好似扮晒嘢,試過俾人欺凌,我啲嘢出現喺垃圾桶已經係好平常嘅事,最嚴重嘅一次,係我個書包出現喺窗台嘅冷氣糟,亦都有同學排斥同杯葛我。」

嗰陣一返屋企,小小莫生就會喊:「唔開心一定會有,有一段時間會覺得,好似身邊啲同學可以去公園玩,但係我就喺片場過,嗰陣會諗點解好似冇得同人玩,嗰陣爹哋媽咪都有輔導我,調節心態,不過我亦都冇後悔參加比賽,因為係我自己嘅選擇。」

「我覺得我嘅童年同其他人唔同,多咗好多人哋攞唔到嘅嘢,嗰陣只係小朋友去玩吓啫,甚至乎有份欺凌我嘅同學,依家都做咗朋友,所以我會覺得係一個特別啲嘅童年。」

娛樂圈係一個大染缸,冇得呃,但係莫生自言知道有啲乜嘢應該做,乜嘢唔應該做,仲有心理準備去接受批評:「娛樂圈係一個好歡樂嘅地帶,經歷好多一般人唔會經歷,我自己都有晒心理準備。人哋嘅批評,如果係事實咪會去改,唔係事實咪聽完就算。」