因為喺ig放自己著性感內衣相、及後被美式足球聯盟（NFL）球隊新奧爾良聖人解雇嘅22歲啦啦隊隊長Bailey Davis，決定告呢間NFL球會性別歧視，希望攞番個公道。

Bailey Davis一月時，喺ig上載自己著咗一套一件頭黑色性感內衣嘅相，雖然都遮晒冇露點，ig管理員亦冇列為不雅照片delete咗佢，但新奧爾良聖人似乎就認為呢張相有損形象，喺出post四日後就解雇Bailey。據《紐約時報》報道，對方已經搵律師進行訴訟，告到去平機會，仲告球會對待佢哋呢班啦啦隊嘅跳舞女郎同球員不同待遇。

話說NFL喺大約九年前曾推出條政策，禁止啦啦隊隊員同球員接觸，包括唔可以喺社交網站聯絡球員，亦唔可以同球員一齊去餐廳用餐，亦曾經規定啦啦隊隊員唔可以著上同球隊顏色相似嘅衫，然後上載相片去社交網站。不過，據Bailey講，佢之前上載自己著泳衣啲照片上ig，亦曾被球會警告過，但佢冇理，之後呢張內衣相，就真係令佢自己連份工都保唔住。

不過，Bailey家陣打正要為女性爭取權益嘅旗號，認為佢哋都應該受到尊重，做自己鍾意做嘅嘢，仲挑戰九年前條政策，話唔准佢哋主動聯繫球員，點解唔禁埋球員亦唔能夠主動接觸佢哋。至於新奧爾良聖人代表律師方面，就話會研究案件，亦澄清球會一向都公平對待所有員工，但喺適當時候，亦要捍衛球會推出嘅政策同工作場所規則。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM