任達華(華哥)同惠英紅(紅姐)主演嘅動作電影《Mrs K》下月在港上映，華哥今日去到銅鑼灣宣傳並接受訪問，提到呢部係紅姐嘅最後一部動作片，華哥大感可惜，佢話：「聽到佢話唔再打，我超級唔開心，邊度有女仔可以操3個月，線條靚到不得了！有張相我哋一齊拎高件衫，見佢有6粒(腹肌)，我都只係得4粒，我幾唔開心呀！畀我就繼續一路打落去，打到打唔到為止。」

華哥話現今冇人能取代紅姐文又得武又得嘅位置，但就話紅姐差少少性感元素，最近華哥籌備緊一部講灣仔情懷嘅動作電影，希望能夠打動紅姐演出，佢話：「會係我自導自演，我哋都喺灣仔長大，可以講吓賣香口膠、走鬼呢啲橋段，要紅姐加埋性感，佢都冇拍過性感戲。」而華哥就話都好希望紅姐搵到另一半。問華哥會唔會叫埋囡囡Ella演出？華哥話：「佢唔鍾意做戲同影相，只愛影人，我諗緊佢將來會唔會做導演，佢做model都OK㗎。」