股海實戰錄:發輪效應漸浮現

蘋果日報 2002/01/26 00:00


港股本周再跌200點,跌幅1.8%。恒指踏入2002年未好過,連跌3周。
趙飛雲望吓恒指張周線圖,技術趨向亦係偏淡,本周叫做跌至20周線(現處10725)有番啲支持,險守其上收市,如果下周期指結算,恒指能守在呢個水平之上結算,已算唔錯。希望下周恒指會喺10700至11300水平整固,踏入2月份表現會好番啲。

中移動太過波動
近期大行紛紛調低中移動(941)投資評級,睇嚟唔單止散戶怕咗佢哋突如其來嘅消息,令人防不勝防,就連大行都開始頂唔順。中移動地位特殊,而且又係期指大戶嘅主要棋子,兵慌馬亂,經常殺錯良民,遲早嚇怕晒啲投資者。
趙飛雲呢個禮拜當黑,唔買嘅股票猛咁升,買咗嘅就唔郁,裕元(551)、利豐(494)等美國概念股咁升法,應該唔多唔少同稍後發輪有關,其實發輪效應已經喺部分股票身上出現,心水清應該留意得到。不過有啲股票如國泰(293)升得急但沽空同時大增者,須提防隨時轉勢。