當年今日
關於我們

團費唔使1千蚊
丘仔、阿倫遊泰國話低玩

蘋果日報 2003/06/15 00:00


泰國向來是港人最愛的旅遊地點,而不少足球員都喜歡在球季結束後選擇到泰國旅遊充電,享受陽光海灘,以及地道美食,藉此紓緩球季緊張心情。
剛與南華續約的兩名港隊球星丘建威及歐偉倫,上月就結伴到曼谷及芭堤雅作短暫的五天遊,雖然兩人過去曾多次往泰國比賽或旅遊,不過今次每人只花千餘元的團費,玩盡各式水上活動,又到曼谷最新的跳蚤市場購物,可謂物超所值。
南華及港隊隊長丘建威原先準備代表港隊赴日踢東亞盃決賽周,但最終因私事及受傷而退隊;而他在辦妥連串私事後便趁空檔小休,與歐偉倫及其女友一起報團遊泰國。

跟團合經濟原則
「丘仔」說:「上季收咧先代表港聯踢回歸盃,之後便開始幫有線講世界盃,世盃未完便讀教練班,唞咗幾日就跟港亞運隊去斯洛伐克集訓,嚴格嚟講,真係冇休息過。今季本來諗住幫港隊踢埋東亞賽,但最後因私事同傷退出,而搞掂晒啲私事,就諗住同女友出去玩番幾日,而見跟團去泰國五日四夜咁平(每人唔使一千元)就決定再去泰國。其實我由細到大去泰國冇十次都有八次,但好多時唞暑都會擇去泰國,因為既可行街又有陽光海灘。」
歐偉倫表示,過去「唞暑」到泰國多數是自助行,其間會拜四面佛,但經濟不景,球隊又減人工,所以今年外出就決定跟團,貪跟團比較便宜,他說:「除了跟團使費較低外,另一擇去泰國嘅原因係食物『啱食』,而我對觀光興趣唔大,所以全程多數同女友自己行街同食嘢。」

享受陽光海灘一樂也
「阿丘」笑說,今次去泰國主要遊覽曼谷同芭堤雅,行程比較輕鬆,首兩天在曼谷遊覽了四面佛、夢幻真雪城及奇趣老虎樂園等必到景點;而去芭堤雅兩天則是陽光及海灘為主,玩了降落傘及滑水,之後又游水,真真正正享受陽光海灘的樂趣。
「此行最值得推介應該要數曼谷最新嘅跳蚤市場。曼谷同芭場雅啲旅遊景點好多都好耐歷史,畀人幾殘舊嘅感覺,但呢個開咗冇幾耐嘅旅遊點,地方清潔又夠大,行到攰又可以去唔同嘅咖啡店飲嘢;而市場重有好多精品買同工藝品買,我就買咗好多手製嘅木花樽留念同做手信。」
empty
empty
歐偉倫(左)與丘建威(右)偕女友同遊泰國。
empty
兩人在夢幻真雪場留影。