前財爺曾俊華（鬍鬚）離開咗政府之後好逍遙自在，噚日晏晝佢幫自己任資深顧問嘅虛擬保險公司Bowtie出席活動，落區去黃埔派6,000粒珍寶珠，仲抽水話政府「派糖」措施唔夠，所以自己落力派糖咁話。

「少少甜頭點可收貨」

華華發現，鬍鬚派嘅宣傳單張仲印咗幾句說話：「親愛嘅香港人，辛苦晒，但少少甜頭點可以收貨？」唔通係指撤回「反送中」惡法係唔夠，暗示港人要繼續爭取餘下四大訴求？不過鬍鬚好快解畫，話今次活動同市民訴求冇咩關係，但就一直有同唔少年輕人溝通，日後有機會再同大家講兩句喎。華華心諗，現時講良心說話隨時好似「超人」李嘉誠咁畀人打壓㗎。

Bowtie今年7月推出標準及靈活計劃兩款自願醫保，聯合創辦人顏耀輝就話，唔少客戶年齡都係30歲左右，目前標準及靈活計劃嘅投保人士比例各佔一半。

李華華
mailto:[email protected]