「聖人」修咸頓嘅英格蘭前鋒查理柯士甸，上年12月就因為肩傷提早收咧，唔使踢波唔使練波，大把時間點打發？竟然就想搞婚外情，一位22歲叫Rissy Gannon嘅索女髮型師爆料，指今年2月俾查理柯士甸狂追2個月，柯士甸仲口口聲聲同老婆Bianca搞離婚添。

英國《太陽報》就爆料，Rissy話自己遇上感情騙子；今年2月佢喺紐伯里一間酒吧遇見查理柯士甸，查理柯士甸見到佢已經嗒晒糖，又話飲酒又豪派50鎊（約500港元）貼士，扮到大豪客咁。起初Rissy問佢叫咩名，柯士甸死到唔肯講，到Rissy朋友搵到佢踢波相，問佢係唔係球星，起埋底有老婆同兩個仔女，柯士甸先死死地氣承認，不過為咗溝Rissy，就呃Rissy搞緊離婚咁話，之後仲發動電話同送花攻勢，Rissy好彩都醒目，同佢約會都搵埋班姐妹陪，拒絕失身俾佢。

不過柯士甸溝女行動終於都俾佢老婆Bianca知道，Bianca仲喺面書留言要同小三激情身心俱疲，Rissy亦都正式拒絕柯士甸，電話都唔再聽。柯士甸行動失敗，只好死死地氣返老婆身邊，休季仲同老婆去巴哈馬度假箍煲添。