去年7月喺北京涉毒嘅張耀揚，今晚都有出席盛品儒同蔡一鳳喺中環四季酒店舉行嘅婚宴，張耀揚表示同蔡一鳳相識多年，同盛先生近半年左右先識，祝兩人永結同心，白頭到老。

問到送乜賀禮？佢話：「自己現實少少，都係送禮金，多少都唔重要。」問佢幾時投入幕前工作？佢話：「未0架。（做緊乜？）有時買下股票，賺咗啲啦。（係咪往返北京？）明天返北京，因為有朋友結婚。」

問到幾時輪到佢做老襯？佢話：「盡快啦，我都咁嘅年紀。」咁有冇片商邀請復出？佢話：「Neversayno，如果有啱都盡快出返嚟發展。」

咁去年涉毒事件有冇影響工作？張耀揚直認：「咁就一定會有，0依家未知接下來工作係點樣做，但件事自己錯咗好多嘢，希望各大觀眾包容我。」

有乜警惕同勉勵下一代？佢話：「冇嘅，我諗我警惕自己最緊要。」問到有冇片商搵佢演吸毒角色會否演？佢話：「我唔敢講，亦都唔知有冇呢類角色搵我做。」