定慧寺女住持釋智定涉嫌兩度「嫁和尚」的假結婚風波，令好多香港人覺得好驚嚇，「又話佛門清靜地?」假結婚當然衰格，但和尚結婚喺其他地方如日本，又未必唔啱喎，最近部分日本女仔仲大叫「我要嫁和尚」㖭。

事緣10月12日首播嘅日劇《朝5晚9》，係講女老師(石原里美)，遇上有學歷有身材、仲要高收入嘅靚仔和尚(山下智久)，之後兩個拍埋拖。套劇仲會講埋男女情慾觀念，被形容為「東京版SEXANDTHECITY」。

山下智久扮嘅和尚有頭髮，仲可以食蟹、結婚，但套劇唔係吹水㗎，日本部分和尚，可以可以帶髮修行，甚至住豪宅、坐名車(釋智定應該好想移民去日本)，可以食肉又可以結婚。

日本傳媒最近仲有報道，話越來越多女仔想嫁和尚，因為覺得一般男仔唔定性唔想結婚，有女仔就話，「和尚給人的印象就是誠實穩重而且非常溫柔」。

不過，仲有一個現實嘅原因，就係家陣日本經濟好差，一名31歲女性銀行職員透露，同普通打工仔比較，和尚收入相對穩定。係㗎，而且好多寺廟住持都係父傳子代代相傳，繼續管理寺廟，都可以話係另類富二代。

費清＃要生計，也要生活＃毋忘初衷