韓國SBS綜藝節目《School Attack》主軸為人氣團體秘密造訪校園舉行突擊演唱會，於2003年首播後大受歡迎，不過節目於09年起停播，直到今年重新拍攝，定名為《School Attack 2018》，由男團水晶男孩成員殷志源、Highlight成員孫東雲及女團GFriend成員Yerin擔任主持人，預計下月播出第二季。

《School Attack 2018》噚日到首爾某女子中學進行錄影，並邀得男團NCT Dream擔任突襲校園嘅嘉賓，節目組就喺各班房安裝鏡頭，以便記錄學生真實反應。由於節目突擊學校進行拍攝一事，並唔係所有學生都知道，所以有一名女學生發現教室天花板裝咗鏡頭後，懷疑係非法拍攝，一眾學生大感驚訝及反感，並即時向老師報告。

據悉NCT Dream之後如常現身表演，節目繼續正常錄製，不過有學生事後向老師反映，喺發現鏡頭前，因為要上體育課嘅關係，有部分女學生留喺教室內換衫，懷疑更衣過程已被攝入鏡頭，學校方面就要求製作組刪除相關拍攝內容。

製作組隨即透過官方twitter發文道歉，解釋：「喺校內部分教室安裝鏡頭，係為咗拍攝學生嘅真實反應，事前有得到校方協助，但對於學生喺心理上產生嘅不悅，我哋承諾會刪走相關鏡頭，今後亦會更加慎重。」

精選韓流，喺晒《娛果》
http://fb.com/appledailyent