曾經同大家度過青春時期一本雜誌《YES！》令那些年青春的你可以儲名星閃卡、追星、迷偶像、分享少女心事，《YES！》card曾經風靡一時，不過隨住時代變遷，已經絕跡。

今晚大家又可以重拾回憶，大家期待以久「YES！25週年演唱會」今晚喺會展舉行，演出嘉賓有香港樂壇校長譚詠麟、草蜢、當年學生情人孫耀威，仲有現今一眾偶像派歌手JW（王灝兒）、SuperGirls、林德信等參與演出。

大部份入場觀眾都係中年年齡層，好明顯係懷念那些年YES年代，都有家長帶埋小朋友嚟睇，亦有團體入場。

大會喺會場外放置咗二十部擰卡機給大眾一嚐當年學生扭卡滋味，而且仲係平價——1蚊1張，就可以得到限量版《YES！》card，眼見現場吸引好多小朋友同年輕人玩呢個玩意，個個圍埋狂扭卡，呢批《YES！》閃卡中不乏今晚表演嘉賓同偶像，大家都好關心當年被冠以「毒瘤明」之稱劉錫明會否有份登上閃卡，答案係有，仲發現唔止一款，有閃有唔閃，睇你彩數如何，而卡背面就記錄左一啲閃卡上藝人簡介，其餘卡中還有葉佩雯、JW、孫耀威等等。