馬術係貴族運動，好多外國皇室成員都熱愛馬術，八方聽聞下星期起，陸續有王子、公主駕到香港觀賞奧運馬術賽，不過大家唔好以為有皇氣照住就係好事，事關有恐怖分子揚言要搞破壞，咁多皇室貴冑嚟到，意味恐襲風險都相應增加，警方已調動4,000警力駐守沙田場地，人山人海，分分鐘阻住佢哋睇比賽。
八方並非危言聳聽，今次分別有英國、約旦同沙地亞拉伯皇室要員嚟香港觀賽，消息透露有關國家領事館已要求警方要睇緊啲。據知幾位皇室成員都有保鑣隨行，香港警方亦會派G4保護要人組貼身保護，出入座駕有鐵馬開路，入住嘅九龍香格里拉大酒店則會有警犬同重點搜查隊徹查有冇危險品，連食水都要驗過先可以畀皇族飲用。

幾位皇族之中，香港人最熟識嘅應該係英國安妮公主（ThePrincessAnne），殖民地時代佢多次訪港，佢曾代表英國參加奧運馬術賽，係目前唯一參加過奧運嘅英國皇室成員，但今次嚟港純粹做啦啦隊，當然唔係為香港打氣，係撐英國馬術隊。
據聞佢囡囡扎拉公主（ZaraPhillips）都會同行，扎拉現年27歲，代表英國贏過06年世界馬術賽冠軍，青春又美麗，係馬術界男fans女神。本來佢都有機會參加今屆奧運，可惜愛駒Toytown受傷，只能做觀眾。
舊年曾嚟香港視察馬術測試賽嘅約旦哈雅公主（PrincessHaya），曾參加悉尼奧運馬術賽，今次以國際馬術聯會（FEI）會長身份訪港。哈雅公主老公係杜拜皇族，身家富可敵國，前年創立資產達700億美元嘅DubaiInternationalCapital基金，大手買入滙豐做咗其中一個主要股東。
三位女士都唔落場，沙地阿拉伯鴨都拉王子（AlSaudHRHPrinceAbdullah）則係選手之一，沙地盛產石油，王室成員有錢唔使多講，佢匹參賽愛駒身價逾1,500萬港元，難怪有關方面唔只保護要人，對馬匹保安都不容有失啦。
mailto:[email protected]