𠵱家一講起睇波，港人諗起嘅唔係皇馬就係巴塞，碧咸、朗拿甸奴係最受歡迎球星，全部都係歐洲波。其實廿幾三十年前，香港波fans都好瘋狂，80年代嘅香港名牌勁旅南華就備受擁戴。1982年3月14日，幾千個「擁南躉」仲因為南華輸咗場波而激動到爆發騷亂㖭！
當日南華對荃灣上演「護級生死戰」，兩萬幾人入場，南華以０:1輸咗，面臨降班。咁大打擊，幾千個南華球迷即刻發癲，狂踢垃圾桶、撞冧交通燈，仲湧晒去南華會停車場叫囂，好彩冇人受傷，只係6個垃圾桶、6個路牌同一支交通燈就咁報銷咗喇。舊年南華都面臨降班，不過大家無乜反應，睇嚟大部份球迷都放棄咗香港波嘞。