利福財務總監潘福全接受查詢時承認,細劉將退出管理香港崇光,因「劉生個人覺得要花多啲時間喺中國業務」,又提到香港崇光營運成熟,而且翻新工程接近尾聲,業績、客流比較穩定,店長對分店相當了解,可以應付到。
咁細劉唔管香港,由邊個管呢?消息人士透露,年僅28歲嘅劉今蟾,將會接替爸爸,擔任利福首席執行官,管理香港崇光百貨嘅日常營運。細劉主力做利福中國主席與行政總裁,兩間公司之間冇高級管理人員重疊,確保獨立管理運作。
對於太子女係咪更上一層樓,潘福全回應話「𠵱家唔公佈住,未定,暫時冇公佈」,但佢強調,劉今蟾已經加入崇光一段長時間,意指太子女熟悉公司業務運作。的確,劉今蟾2012年已加入利福,現負責國際品牌與銷售推廣,但就比較怕醜。
李華華
mailto:
[email protected]