水晶宮前鋒賓迪基上星期六喺球隊以0:5大敗畀曼城嘅英超賽事下半場傷出，星期一經過掃瞄檢查後顯示佢嘅膝部韌帶受傷，估計至少要養傷六個星期，對於要護級嘅水晶宮嚟講肯定係壞消息。

水晶宮今季喺英超開季六場輸晒而且一球都未入過，由於另一前鋒域文亦養傷多時，而球隊今夏放走咗費沙甘寶同雷米，但喺轉會窗截止之前想簽愛華頓嘅塞內加爾鋒將奧馬尼亞斯又唔成事，依家26歲嘅賓迪基傷埋，領隊鶴臣可能需要考慮喺自由球員市場搵番個前鋒嚟。據悉，35歲嘅英格蘭前鋒列基林拔會係可能人選之一，佢喺今夏離開咗卡迪夫城之後目前係自由身。