【新增動新聞】
特首林鄭月娥昨日出席民主黨黨慶期間，即席捐出3萬元贊助李華明表演唱歌，雖然金額遠不及當年中聯辦張曉明以親筆墨寶為民建聯籌得1,380萬元，疑惹起建制人士「眼紅」。身兼行政會議成員的新民黨主席葉劉淑儀批評林鄭公開捐錢，對政府和民主黨都帶來不良觀感，「我覺得唔好囉！好似買票咁囉，其實對民主黨都唔好，聽講啲網民笑佢，3萬蚊買起你。」

葉劉稱，過去她亦有出席過其他政黨黨慶和捐錢，但只是象徵式，「我哋都做例牌人情、送花啦，1、2,000嗰啲人情、靜靜雞寫張支票」，她指林鄭公開捐款日後會難做人，「變咗好多人問你，點推啫？咁咪成份人工捐出嚟？我唔知特首點處理。」她又形容林鄭的行徑形同買票，「買人嘅good will（友善）、買人通過你啲嘢或者鬧少你幾句，咁咪唔係好囉。唔同你三萬蚊就大和解？」

她指事後建制派亦對林鄭捐款一事有意見，「我哋個個都笑，個個又問特首攞囉！個個都話『我哋值幾多呀？』我哋有咁多人、舉咗咁多手，你話民建聯，汗馬功勞喎、零的突破喎！阿舜（鄭泳舜）值幾多錢呀？」最後更寄語林鄭「希望特首派畀低收入人士唔好淨係派2,000蚊，派多啲啦！」

建制派議員何君堯回應指，在香港任何人都可以作出任何捐獻，「係咪先？我覺得無問題啊，喺香港嚟講，亦無任何所謂政治捐獻嘅限制」。他指林鄭向民主黨捐款3萬元「純綷係一個良好的姿態」，釋出善意而已，「我諗我哋大家唔需要過份解讀嘅」。

全國政協常委、前政務司司長唐英年回應傳媒查詢時指，相信市民普遍希望社會更和諧及團結，指林鄭出席民主黨黨慶，「積極支持佢哋（民主黨）、亦表示伸出和解之手，希望大家更好地合作，我覺得民主黨應該領呢個情」，唐並希望民主黨能在理性、積極及共建香港發展的底線上，與特區政府更好地合作。

《蘋果》沙士15周年系列網站，正式登場：
https://hk.feature.appledaily.com/sars15/ 。