《明報》前總編輯劉進圖被兇徒斬六刀，有藝術家覺得手法好狼好暴力，唔知狼英點保障新聞自由。藝術家眼見港人近排好迷韓劇《來自星星的你》，於是乎發揮創意，最近喺新界某處天橋底，創作咗一幅成道牆咁大嘅政治塗鴉，作品名叫做「來自腥腥的CY」。
呢幅塗鴉氣勢好勁㗎，橋底下嘅CY一手拎鐮刀，另一隻手攞鎚，鎚仔同鐮刀係共產黨標誌，後面仲有簡體字「來自★的你」，襯埋一片血紅色背景好有中共feel，亦都好血紅血腥呀！

藝術家：驚俾路政署鏟走

作者自稱係一個「關心香港嘅本地街頭藝術家」，但唔想開名。呢幅噴喺高牆嘅塗鴉，狼英着住公安服，藝術家話，呢個idea好簡單，因為香港最近發生嘅幾件大事，先係全人類變晒「煲星星的你」，然後就係上周發生咗劉進圖被斬事件。加上路政署最近用維修理由，鏟走咗法國藝術家Space Invader嘅作品。呢三件事，都令香港街頭藝術家反思。
唔少網民都好鍾意呢幅畫，覺得好靚。負責創作嘅藝術家話，其實香港本地都有好多才華嘅街頭藝術家，可惜呢，香港太難有個地方可以畀佢哋慢慢醞釀作品咁話。講到底，作者本身都好驚狼英㗎，佢話「方丈好小器」，唔好講畀人知幅畫喺邊，因為佢都怕「方丈」會派路政署鏟走咗佢。

mailto:[email protected]