中國U20國奧隊透過向德國第4級別西南區聯賽（Regionalliga Südwest）19支球隊「課金」約250萬港元換取參賽權嘅風波懸而未決，據德國《踢球者》同《科隆快報》民意調查，分別有84.7%同78%受訪者反對國奧「空降」。不過，相關球隊就意見兩極，除咗揚言杯葛罷賽嘅激進派SV曼海姆（SV Waldhof Mannheim 07），禾寧根（Röchling Völkingen）同沙貝魯根（1. FC Saarbrücken）亦表明反對，但艾費斯堡（SV Elversberg）就表示贊成，據報有關球隊連同賽會將於7月11日嘅教練會議上再作商討。

講咗咁耐，到底國奧U20同德國地區球隊嘅實力點樣比較？咁啱由前曼城守將孫繼海擔任領隊嘅國奧U20，上周起展開為期3周德國集訓，周二晚就同上季德丙第10位球隊哥莎柏治（SG Sonnenhof Großaspach）友賽，結果有皇家馬德里預備組球員林良銘等正選上陣下，89分鐘俾對手絕殺輸0:1。