藝人時不時都需要喺鏡頭前攬住其他人，雖然都會獲另一半體諒，但原來仔女係未必會接受到，汪詩詩、黃婉曼、張寶華跟黃漪鈞今日去到中環，出席春夏時裝預覽。

甄子丹早前以肥仔造型接拍廣告大獲好評，汪詩詩指有唔少創作單位被呢個廣告啟發，希望拍出更多具突破性廣告。詩詩日前將電話中攬住肥版子丹嘅相俾女兒睇，點知個女非常大反應問「媽咪攬住邊個」，連詩詩嘅媽咪都認唔出係自己女婿子丹，佢急住同孫女解話:「媽咪係工作時影嘅，並非真係攬住其他人。」詩詩最後要慢慢同兩人解釋相中人係廣告中子丹造型。

講到會否介意粉墨登場拍廣告，詩詩指自己係模特兒出身，思想上會較開放，唔介意扮醜扮肥造型，但唔敢扮老，佢笑指唔想太早見到自己個老樣。

黃婉曼婚後甚少幕前演出，近期專心研究整麵包甜品，所以同老公都發福不少，佢笑指好彩自己手腳夠瘦可以呃人，平時又會多著V領衫，令人望落去都會覺得塊面型瘦少少。嚟緊會接拍港台劇，佢話:「今次角色做番老本行記者，都幾吸引到我，又可以過下癮，因為再做番記者都應該冇乜機會，其實我有同老公講有機會做番記者好嗎？佢話叫我去整麵包好啦。」婚前不時恨早啲做媽咪，問到進度如何，佢笑指婚後反而唔急，享受下二人世界先，留待明年先算。