下星期日（9日）就係香港國際賽日，四場一級賽嘅騎師配搭近乎全部落實。當中，上仗馬會一哩錦標勇奪季軍的七歲馬「美麗大師」，將飛起老拍擋郭能，第一次由布文執韁，出戰正本戲香港一哩錦標。

雖然呢場焦點落在同一馬主家族的「美麗傳承」身上，但「美麗大師」突然換人，的確頗為特別。郭能在國際賽日四場一級賽都冇馬騎，「美麗大師」上場追入季軍，練馬師告東尼亦滿意人馬表現。

該場早段「美麗大師」走二疊，而大摩訓練嘅「美麗傳承」當時喺潘頓胯下走三疊，曾希望可移入找遮擋卻不得要領，郭能的「美麗大師」不讓「美麗傳承」切入，陣上當然各為其主。

於是中段「美麗傳承」索性在外疊加速上前帶頭，最後「美麗傳承」克服外疊掄元，「美麗大師」亦跑入位置。

郭能冇得騎「美麗大師」跑大賽，但他謂仍有句說話想講，就是仍衷心祝福這匹他心愛的馬，希望牠可以跑出好成績。

今午（2日）沙田第四場五班泥地1200米，鄭俊偉馬房「加加友福」前仗四班同程交出一段追勢跑第六，上仗增程泥地1650米一時未能適應。

今場回師1200米兼初次降入五班參賽，對手減弱，正係郭能展現功架，以及再次證明自己能力的好機會。