陸駿光噚日喺元朗拍攝ViuTV新劇《Plan B》一場追殺戲時撞傷膝頭,皮開肉綻,結果要到醫院打破傷風針。
講起事發經過,陸駿光話:「嗰場戲講我要追殺一個人,喺深山入面,一action我就要走入坑渠入面追殺人,落去嗰吓,左腳落坑渠,右腳膝頭就撼埋去側邊個壆,嗰吓好痛,但一路拍緊,所以冇停繼續做埋落去。」
拍完場戲後,陸駿光即刻檢查傷勢,發現條褲爛咗,打開一睇見流咗好多血,同埋有啲白色嘢,初時以為見骨,就問劇組攞消毒藥水,佢話:「嗰刻都冇嘢,知道唔係太嚴重,諗住攞消毒藥水就算,繼續拍埋落去,但劇組話環境太污糟,驚我受感染,一定要去醫院。」