滙豐控股（005）噚日照舊一連兩日喺上海召開董事會，雖然話選主席單嘢已經塵埃落定，但管理層換班引起嘅種種是非，傳媒都仲密切跟進緊，尤其係「誰是洩密者」，而紀勤做唔成真正「獅王」兼劈炮唔撈有咩感受，大家仲想知囉！
紀勤嘅心情睇落幾平靜，仲好大方咁同記者講佢唔知邊個係洩密者，但就加重語氣話：「有董事已經解釋得好清楚，呢件事係好陰毒（diabolical）嘅、係有人製造事端」。
換句話講，紀勤覺得係俾人砌生豬肉、擺咗上台，咁點算好呢？紀勤話，對付呢啲傳言嘅最好做法，係「由得佢、置之不理」……俾人踩到咁盡、被迫遞信都可以一笑置之，紀勤又唔似坊間講到咁火爆喎！咁家董事會係咪要抽出內奸呀？紀勤話：「點樣做由主席葛霖決定，我唔係主持董事會嘅。」佢仲話：「我做行政總裁好過做主席。」所以佢唔會因為無得做主席而失望喎！聽落似乎吃不到的葡萄，真係幾酸囉！