當年今日
關於我們

【李八方online】 DQ刀手蔡亮接班人 做過吳得掂政務助理

蘋果日報 2020/03/17 16:31

區議會民政事務專員DQ抗暴之戰蔡亮余健強

去年底嘅區議會選舉,南區DO馬周佩芬(馬太)遲遲唔肯確認香港眾志參選人黃之鋒嘅候選人資格,最終仲話病咗,政府改由油尖旺專員蔡亮任「劊子手」DQ黃之鋒。

區選曲終人散,「病倒」而唔落手DQ嘅馬太早前已經調任環保署做助理署長,至於刀手蔡亮呢,亦喺早前公佈咗會調職去上海,但因為武漢肺炎而延遲起行,至今日政府終於宣佈咗佢嘅接班人。

政府公佈,新任油尖旺DO係由做過教育局政務助理嘅余健強(Edward)出任,明天(18日)履新。Edward 1998年開始加入政府,曾經喺多個政策局工作,包括運輸局、前政制事務局、前教育統籌局、商務及經濟發展局同教育局等,調任油尖旺民政事務專員前出任民政事務局首席助理秘書長(康樂及體育)。佢最令人印象深刻嘅可能係做過兩任教育局局長吳克儉同埋楊潤雄政務助理,以「外訪」出名嘅吳克儉都帶過佢多次外訪。

油尖旺區議會副主席余德寶回覆八方指,蔡亮調職之前,都帶過Edward同區議會正、副主席作非正式會面,席間雙方只係介紹吓自己,佢覺得對方「正正常常咁啦」,至於工作能力就要之後睇吓先知啦。而上星期嘅地區設施委員會,Edward都有列席,準備交接,期望雙方可以保持溝通。

家陣做DO,確實唔容易,除咗面對議會角力,仲要做「刀手」;9月立法會選舉殺到埋身,唔知Edward一旦要操刀,會唔會辣過蔡亮?

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架