踏入七月又係o靚模各施各法出招Sell寫真嘅時候,今年有份出寫真嘅黃榕同Donut兩位成員陳若嵐(Melody)同譚詠怡(Victoria)應有線邀請,接受《娛樂熱辣辣》節目訪問,仲要求佢哋即場作才藝表演,谷胸上陣嘅榕姨就跳一Part火辣典地舞,雖然睇落冇咩「才」,但都完全將表演唱歌嘅「後浪」Melody同講棟篤笑Victoria技術式擊倒,之後佢哋又獲派生果拎住擺甫士,呢Part就到胸前抬住兩個小木瓜嘅Victoria搶鏡。
榕姨指隻舞準備咗不足兩日,嚟緊佢都想開拓音樂市場,八月會出歌再配合舞蹈,因為想登台時有自己歌曲,講到今年本寫真,佢都係覺得自己本係最性感,因為繼續冇衫著,問佢有冇睇過羅霖輯相?佢話:「有呀,係成熟美,我好欣賞,希望自己50歲時都影到,好羨慕。(妳之前已經被人話年紀大出寫真?)一山還有一山高,我吸引宅男,佢就會多成熟男仕睇。」佢強調自己身材均勻,有別於其他大胸o靚模。
Victoria同Melody會聯同另外四位成員出寫真,Melody指優勝之處係本寫真人多抵睇,問到佢兩個加埋夠五十歲未?佢哋話未,原來Victoria今年26歲,而Melody只得22歲,佢哋話:「我哋市場係吸引讀書同宅男,而佢(羅霖)係會成熟型男仕鍾意。」