颶風哈維吹襲美國德州，重災區侯斯頓更加成為澤國；美國各界都伸出援手，體育界方面，NBA同NBPA（球員工會）宣佈，各捐100萬美金（約780萬港元）賑災，火箭班主阿歷山大，早前宣佈捐400萬美金，今日就加碼，捐夠1,000萬美金（約7800萬港元）。

另外，由NFL侯斯頓德州人球星JJ華特（JJ Watt）攜頭嘅籌款活動，原本目標係150萬美金，火箭球星基斯保羅（Chris Paul）亦都響應，捐出5萬美金。經過3日已經迅即突破400萬美金，JJ華特仲喺個人Twitter表示新目標係500萬美元。另外前火箭球星姚明，亦都喺Twitter鼓勵侯斯頓災民。