曼聯即將正式收購前鋒盧卡古，呢位比利時中鋒亦係車路士今夏頭號收購目標，俾紅魔截糊梗係氣頂。據悉車路士球會對曼聯心深不忿，原本曼聯希望收購車仔嘅中場尼曼查馬迪，但依家已經唔使諗，車仔堅拒賣馬迪畀紅魔，不過隨時搞到車仔自己俾曼聯剃多次眼眉。

既然買唔到馬迪，曼聯隨時加速斟介下一目標，偏偏又係車路士嘅增兵對象，法甲摩納哥防中泰莫爾巴卡約高。早喺兩個星期前已經傳車仔即將搞掂呢單交易，點知遲遲都未得；據講摩納哥方面都已經唔耐煩，倒不如賣畀出手爽快嘅曼聯。