喺麗嘉酒店Toscana食意大利菜，環境甚為清靜，中午時分，只有一半上座率，傾密偈，隔籬冇人聽到，不過咁噃，此酒店有不少中環名人幫襯，同邊位食飯，完全不是秘密。
兩點幾鐘，大家走出麗嘉酒店，喺香港會大廈旁等過馬路，兩位八十歲以上嘅老人家李福善何佐芝擦身而過，佢哋係香港會常客，在此出現，一啲都唔奇。喺呢度企十五分鐘，包保打招呼都嚟唔切。同行之T博士話，佢不久前在此見到梁錦松、許仕仁兩位反方向迎面走過，兩人直行直過，唔打招呼，似乎唔認識對方咁。T博士是讀書人，甚為天真，竟然問左丁山：「阿松唔識肥龍嘅咩？」呢條係IQ題，自己搵答案可也。

行到太子行過馬路，斑馬線上撞到會計S，佢喺銀行做管理。左丁山信口開河，同佢開玩笑：「有冇同北韓做生意呀？」會計S臉色一沉，立即拖住左丁山走去天星碼頭方向，對左丁山講：「你唔好噏得出噏，北韓係敏感字眼，大家都知道澳門單嘢嘅啦！左丁山話：「澳門啫，香港唔使驚呀嘛！」會計S話：「唔好講笑，金管局已經問啲銀行有冇同啲敏感國家有生意往來，例如北韓、伊朗、古巴、利比亞、尼日利亞等等，你話點答？」梗係從實招來啦，做國際生意，有時冇辦法避開呢啲國家嘅，報咗上去，咪等金管局下指引囉，睇吓金管局會唔會明令禁止？
講起嚟，香港處境微妙，香港係中國地方，係金融中心，北韓係祖國嘅好朋友，吳儀啱啱訪問完平壤，與金正日表示友好，但北韓亦係美國嘅眼中釘，你話香港要聽美國講還是聽祖國指示？假如國營銀行與北韓有往來，人民銀行話OK，金管局唔通話NO？呢條又係IQ題。