韓國天團BIGBANG嘅T.O.P除咗唱歌外，亦都有拍下電影，至於電視劇就唔多作品，出道至今只係拍過兩齣電視劇，對上一套已經喺2009年嘅《Iris》。

不過今日就有好消息傳出，根據電視台方面講，T.O.P將會夥拍日本女藝人、「野田妹」上野樹里合作拍劇，據相關人士話：「CJE&M即將投入製作網路劇，目前已確定兩位主演，男主角喺近期於影視有出色表現嘅T.O.P，女主角就由日本人氣女演員上野樹里擔任。」

呢部網絡劇暫時未有劇名，佢哋兩位主角亦都開始為劇集做準備，故事內容係講擁有不同生活嘅韓國男子同日本女子為咗克服初戀帶來嘅痛苦，開始尋找新愛情嘅故事。T.O.P會飾演懷着初戀傷痛嘅回憶，但依舊相信愛情嘅男主角優賢，上野就會飾演對愛情依舊有很多憧憬嘅Haruka。呢部劇已經籌備咗成年，預計下半年播出，並會喺韓國及日本進行拍攝，將會以網路劇或者電視形式播出。

另外，李敏鎬舊愛朴敏英最近因為韓劇《Healer》帶挈關係，令佢喺內地人氣急升，近日佢仲被邀請擔任內地版《花邊教主》（GossipGirl）嘅主角之一，正式進軍去內地市場，而內地電視台方面就話因為朴敏英係新時代明星，備受關注，所以相信佢嘅演出，會令電視劇也更加令人期待。