最近努力減肥四十磅嘅林二汶，今日去到商台為十月舉行演唱會作宣傳，佢指距離減磅目標仍仲有十幾磅，佢話：「上圍當然有縮咗，不過整體比例都一樣，相反望落去條腰幼咗，好似瘦得更明顯。」哥哥林一峰一向都係瘦底，佢就踢爆指哥哥已經年屆四十兼中年發福有肚腩，佢笑住話：「佢瘦咗咁多年，我企喺佢身邊肥咗咁耐，係時候佢要還。」重提上次喺台邊發生意外跌倒撞親額頭，佢承認至今仍然有陰影。再次上台都唔敢行近台邊，因為上次只係好彩有少少破相，嚴重起上來可以有生命危險。