黃修平噚晚喺尖沙嘴文化中心出席「第42屆香港國際電影節頒獎禮」，黃修平擔任國際短片競賽評審，佢話：「今次做評審，事前睇咗20幾部入圍短片，來自唔同地方，發現歐洲同香港嘅風格取材好唔同，歐洲多實驗性啲，而香港就多數係劇情。」

不過今次香港可謂全軍覆沒，冇一部短片入到圍，黃修平笑話：「我之前都問過大會係咪唔受香港玩，初選時已經入唔到圍，其實冇高低之分，只係大家風格唔同，唔係香港片唔入流，鮮浪潮片嘅水準，我真係講唔出差過人，但就偏向劇情，希望香港人拍短片，做多啲實驗性，跳出劇情框框。」

至於執導《狂舞派3》嘅進展方面，黃修平話：「今年會開拍，劇本同幕後工作o依家搞緊，男女主角演員未開始排舞，會個別同佢哋溝通，演員有新有舊，BabyJohn同顏卓靈一定歸位。」

精選娛聞，喺晒《娛果》
http://fb.com/appledailyent