韓流始祖裴勇俊去年7月同朴秀珍結婚後，今年4月宣佈造人成功，懷有身孕嘅朴秀珍未有全面停工，除了邊拍節目外，亦不時孖老公去旅行，認真幸福。

朴秀珍雖然做咗人妻，但佢就依然好錫粉絲，成日喺Instagram上載照片，公開生活照，同粉絲分享下佢現時嘅生活。今日朴秀珍又先後上載咗兩張相，當中一張就展示五顏六色嘅菓子，唔知大肚婆呢期係唔係最鍾意食呢種零食呢？

之後朴秀珍又上載咗一張佢插緊花嘅照片，佢身在一間花店內，圍上圍裙坐喺度插緊花，可見懷孕5個多月嘅朴秀珍上圍升cup不少，而佢個肚亦顯得圓碌碌，似乎本身身形纖瘦嘅朴秀珍終於似返個大肚婆。

另外，事隔幾個鐘，韓劇《她很漂亮》女星黃靜茵都有晒學插花嘅照片，睇嚟佢哋呢兩位人妻就約埋去學插花。事關黃靜茵同朴秀珍都係女團Sugar嘅成員，自然成為好友。