香港有兩間茶記做到有聲有色，一間係已經上市嘅翠華（1314），另一間係成日被人催上市嘅太興。太興老闆陳永安噚日坐住直升機出場，宣傳香港機場入面第一間分店，仲猛呻生意難做，但業主點都唔肯減租。
「直升機」最近忽然成為城中熱話，人稱安哥嘅陳老闆，噚日帶住餐廳代言人郭偉亮（Eric Kwok）同公司高層，朝早坐直升機喺高空巡視香港業務，再空降半島酒店頂樓開記者會。據講，成個活動花咗6位數做宣傳費，認真大手筆。
雖然LV、Gucci等名牌，開到聲要求香港業主減租，但陳永安話旗下香港嘅餐廳，年初至今續租租金「一間都未減過」，加租幅度只算「冇咁狠、冇咁癲」。太興餐牌年初曾加價3%，佢睇淡下半年市道，話暫時冇再加價嘅計劃。

漁牧　點心瑪莉　登場

生意唔算好，但太興擴張嘅大計就冇停到，估計全年開30間新店，其中8間喺香港。安哥乘機硬銷兩個新品牌，分別叫「漁牧」同「點心瑪莉」，前者主打新派京川菜，最出名食片皮鴨同乳豬，人均消費200蚊；後者賣中西點心，價錢比較大眾化。
太興𠵱家唔止搞茶餐廳，仲有8個副線品牌，由太子爺陳家強（Tommy）打骰。80後嘅陳公子由英國學成歸來，成名作係台式人氣餐廳「茶木」，兩年間已經開咗16間分店，生意做得有板有眼。不過，陳公子噚日冇現身，可能唔想搶咗爸爸風頭。
集團不斷擴充，準備上市是常識吧？安哥笑笑口話「都估到你哋會問」，即時交個例牌答案：「等多兩、三年先喇，𠵱家仲未有時間表」。

李華華
mailto:[email protected]